Բուժական սնունդը պանկրեատիտի ժամանակ. izmirlianmedicalcenter.com

Ենթաստամոքսային գեղձի ֆերմենտները նպաստում են աղիներում սպիտակուցների, ճարպերի և ածխաջրերի ճեղքմանը: Ենթաստամոքսային գեղձի կողմից  անջատված հորմոններից, օրինակ, ինսուլինը, արյան մեջ ապահովում է գլյուկոզայի նորմալ մակարդակը: Եթե ենթաստամոքսային գեղձի հետ կապված խնդիրներ են առաջանում, ապա առաջին ախտանիշներն են՝ ստամոքսի շրջանում սուր ցավը, փսխումը, կղանքի խանգարումը:

Պանկրեատիտի (ենթաստամոքսային գեղձի բորբոքում) առաջացմանը կարող են նպաստել տարբեր պատճառներ՝ սխալ սննդակարգը (ճարպոտ սնունդը), սննդային թունավորումը, ալկոհոլը, վարակները, լյարդի հիվանդությունները, վնասվածքները: Անկախ նրանից, թե ինչպես է ընթանում պանկրեատիտը՝ սուր թե քրոնիկական, հիվանդության բուժման համար անհրաժեշտ է հետևել սննդակարգի:

Ինչ են խորհուրդ տալիս բժիշկները պանկրեատիտով հիվանդներին.

• սնունդը պետք է պատրաստել գոլորշու վրա, քանի որ այն չի վնասում օրգանիզմին և պահպանվում են սննդարար նյութերը,
• պետք է ուտել փոքր չափաբաժիններով՝ օրը 5-6 անգամ,
• բոլոր ուտեստները պետք է տաք լինեն ոչ շատ տաք և ոչ շատ սառը,
• պարտադիր պայման է սնունդը կիսահեղուկ կամ մանրացված, տրորած ձևով ընդունելը,
• սպիտակաձավարը, հնդկաձավարը, վարսակը և բրինձը պետք է եփել ջրի վրա ու տրորել:

Սուր պանկրեատիտի դեպքում մի քանի օր անհարաժեշտ է պահպանել սոված սննդակարգ` քաղցած մնալ, թույլատրվում է միայն մեծ քանակությամբ առանց գազի հանքային ջուր, մասուրի եփուկ կամ ոչ թունդ թեյ:

Արգելված մթերքներ

Անհրաժեշտ է սննդակարգից բացառել կամ նույնիսկ ընդմիշտ հրաժարվել հետևյալ սննդից.

• ճարպոտ,
• տապակած,
• թթու,
• թթու հյութեր,
• պահածոներ,
• երշիկեղեն,
• ապխտած ուտելիքներ,
• շոկոլադ,
• հրուշակեղեն,
• ալկոհոլ,
• սուր համեմունքներ:

Չնայած բոլոր սահմանափակումներին՝ հարկ է հիշել, որ սնունդը պետք է լինի բալանսավորված և պարունակի սպիտակուցներ, ճարպեր, ածխաջրեր, հետևել, որ սննդակարգը լինի տարատեսակ, ներառի բուսական սնունդ և կենդանական սպիտակուց:

Թույլատրելի մթերքներ

Քրոնիկական պանկրեատիտի ժամանակ շատ կարևոր է հետևել սննդակարգին՝ հիվանդության սրացումից խուսափելու համար:

Ի՞նչ կարելի է կիրառել սննդի մեջ պանկրեատիտի ժամանակ.

• Կաթնամթերքից` կեֆիր, յոգուրտ, ոչ թթու կաթնաշոռ, ոչ սուր համով պանիր,
• մսամթերքից` տավարի, հորթի, հավի, հնդկահավի, ճագարի միս, սակայն միայն կոտլետի, պյուրեի, սուֆլեի ձևով,
• ձկների ոչ յուղոտ տեսակներ՝ ձողաձուկ, շիղաձուկ, բրամ, գայլաձուկ,
• խաշած կամ խորոված բանջարեղեն` մանրացված ձևով,
• ցորենի չորացրած հաց կամ չորահաց,
• ապուրներ (բանջարեղենային, հավի, վերմիշելի),
• ձու (գոլոշու վրա պատրաստված ձվածեղ),
• ճարպեր. սերուցքային կարագ, ձիթապտղի, ռաֆինացված արևածաղկի յուղ,
• ձավարեղեն և մակարոնեղեն՝ մակարոն, վերմիշել, վարսակ, սպիտակաձավար, հնդկաձավար, բրինձ,
• մրգեր՝ ոչ քաղցր, խորոված տանձ և խնձոր,
• քաղցր կոմպոտներ, ժելե, կիսել,
• ըմպելիքներ. ոչ թունդ թեյ, մասուրի և ցորենի թեփի եփուկ:

Հարցեր, պատասխաններ, մեկնաբանություններ